IGR: 0231. Versión: 59. Rima: ó. Hemistiquios 47.
Sarajevo (Bosnia)
Caballeros van y vienen, por la ciudat de Aragón.
Todo el que hijo varón tiene, a la guerra lo envió.
Por ahí pasó un buen viejo, un buen viejo dublado en dos,
bendiciendo al pan y al vino y al Dio que se le dio,
maldiciendo la su esp[o]sa que siete hijas le parió.
. . . . . . . . . . . . . . . . . . . sin ningún hijo varón.
Saltó la más chica y dijo, la que en buen mazal nació:
Non maldiga, el mi padre, non maldiga, el mi señor!
Démi armas y caballo y un vistido de varón,
Démi armas y caballo, a la guera me vo yo.
Non hables tú, mi hija, non hables tal deshonor.
Tu hermoza pechadura non demostra de varón.
Mi pechadura, [el mi padre], con el paltó la tapo yo.
Tu hermoza trensadura non demostra de varón.
Mi trensadura, el mi padre, con el chapeo la tapo yo.
Tus hermosas coloricas non demostran de varón.
Mis colores, el mi padre, por el aire y el sol,
mis colores, el mi padre, por el aire y el sol los perdo yo.
Tomó armas y caballo y un vistido de varón,
tomó armas y caballo y a la guerra ya partió.
Messageros van y vienen, que media guerra ya ganó
guereando y peleando, el chapeo le calló.
¿Qué vos conti, la mi madre, lo que hoy me acapitó?,
Un mansebo vino a la guerra, hija es y varón no.